Kúnstpása - Á þjóðlegum nótum 

| Um viðburðinn

Benedikt Kristjánsson og Mathias Halvorsen flytja verk eftir Jón Leifs og Benjamin Britten undir yfirskriftinni Á þjóðlegum nótum á síðustu Kúnstpásu starfsársins þann 9. maí kl. 12.15 í Norðurljósum. 

Öll velkomin og aðgangur er ókeypis!

Benedikt Kristjánsson hóf söngnám 16 ára gamall við Söngskólann í Reykjavík hjá Sibylle Köll og síðan Margréti Bóasdóttur. Samhliða námi söng hann í Kór Menntaskólans við Hamrahlíð og Hamrahlíðakórnum undir stjórn Þorgerðar Ingólfsdóttur. Benedikt lauk framhaldsprófi frá Tónlistarskólanum í Reykjavík vorið 2007 þar sem Margrét Bóasdóttir var kennari hans. Hann stundaði nám við "Hanns Eisler" tónlistarháskólann í Berlín og útskrifaðist þaðan árið 2015. Hann hefur sótt Masterklassa hjá Peter Schreier, Christu Ludwig, Elly Ameling, Robert Holl, Andreas Schmidt, Thomas Quasthoff og Helmut Deutsch.

Benedikt hlaut 1. verðlaun í alþjóðlegri Bach söngkeppni í Greifswald í júní 2011 og einnig verðlaun áheyrenda. Hann hlaut verðlaun áheyrenda í alþjóðlegu Bach keppninni í Leipzig sumarið 2012, fékk styrk úr Jean Pierre Jaquillat sjóðnum og var valinn Bjartasta vonin í sígildri og samtímatónlist á Íslensku tónlistarverðlaununum. Árið 2016 var hann valinn Söngvari ársins í sígildri og samtímatónlist á Íslensku tónlistarverðlaununum.

Árið 2019 fékk hann OPUS Klassik verðlaunin fyrir "nýstárlegustu tónleika ársíns" en þar flutti hann Jóhannesarpassíu Bachs í óvenjulegri uppfærslu, ásamt sembal og orgelleikara, og slagverksleikara. Það sama ár kom út fyrsta sólóplata hans, ,,Drang in die Ferne“, og á honum eru tvinnuð saman sönglög eftir Franz Schubert og íslensk þjóðlög sem sungin eru án undirleiks.

Platan fékk mikið lof gagnrýnanda í Þýskalandi og á Íslandi, og var líka tilnefnd sem plata ársins á ICMA, OPUS Klassik og á íslensku tónlistarverðlaununum 2020. Árið 2020 fékk hann sín þriðju verðlaun á Íslensku tónlistarverðlaununum, sem söngvari ársins í sígildri og samtímatónlist. Það ár flutti hann einnig ,,óvenjulegu" Jóhannesarpassíuna í tómri Thomasarkirkju í Leipzig við gröf Bachs á föstudaginn langa. Viðburðurinn var gríðarlega vinsæll og hundruð þúsundir fylgdust rafrænt með um heim allan. Einnig var viðburðinum streymt á MDR og ARTE Concert.

Benedikt hefur komið fram sem einsöngvari í mörgum af stærstu tónleikahúsum heims, eins og Fílharmoníunni í Berlín, Concertgebouw Amsterdam, Chapelle Royal í Versölum, og í Walt-Disney Hall í Los Angeles. Einnig hefur hann sungið í Óperuhúsunum Staatsoper Berlin, Theater Kiel og Staatstheater Braunschweig, þar sem hann hefur flutt bæði barrokk og nútíma óperur. Hann er tíður gestur á virtum tónlistarhátíðum, eins og Bachfest Leipzig, Musikfest Stuttgart, Händelfestspiele Halle og Oude Muziek Festival Utrecht og hefur unnið með mörgum virtum stjórnendum, þar má nefna Reinhard Goebel, Reinbert de Leeuw, Peter Dijkstra, Vaclav Luks, Hans-Christoph Rademann, Vladimir Jurowski og Philippe Herreweghe.

Mathias Halvorsen píanóleikari býr í Reykjavík með fjölskyldu sinni. Hann kemur reglulega fram um alla Evrópu þar sem hann flytur kammertónlist og á einleikstónleikum auk þess sem hann hefur unnið mikið við tónsmíðar. 

Mathias lærði hjá prof. Jiri Hlinka (2006-2010) í Ósló og með prof. Gerald Fauth (2011 - 2013) í Leipzig. Árið 2009 uppgötvaði hann handrit píanókonserts nr. 5 eftir norska tónskáldið Halfdan Cleve í Þjóðarbókhlöðunni í Ósló og flutti hann með Ríkissinfóníu Litháen og hljómsveitarstjóranum Gintaras Rinkevicius. Síðan 2010 hefur hann haldið tónleika sem stofnmeðlimur hinnar lofsömu hljómsveitar LightsOut. Árið 2020 flutti hann G-dúr píanókonsert Ravel með JEB hljómsveitinni og Miguel Perez Inesta í Berliener Philharmonie. Mars 2022 lék hann og hljóðritaði píanókonserta eftir Korngold og Ravel með Otto Tausk og norsku útvarpshljómsveitinni. Mathias hefur einnig komið fram á Schleswig-Holstein Festival, Brighton Festival, Mofo (Tazmania), Yoko Onos Meltdown (London), Oranjiewoud Festival (Nederland) og Portland Chamber Music Festival. Hann hefur einnig leikið í Philharmonie de Paris, Elbfilharmonie (Hamburg) Nikolaisaal (Potsdam), Münchner Kammerspiele, Onassis Cultural Centre (Aþenu), Queen Elizabeth Hall (Southbank Centre) og Kampnagel (Hamburg) - svo eitthvað sé nefnt. Síðan í apríl 2019 hefur hann verið á tónleikaferðalagi með Mathieu van Bellen fiðluleikara í nýjum uppsetningum á La Boheme og Tosca, með aðeins fiðlu, píanó og texta. Hann hefur einnig gert nokkur dans- og leikhúsverk með leikstjóranum og danshöfundinum Laurent Chetouane. Ein þeirra, gamanmyndin 'Den Stundesløse', sýndi frumraun Mathias í leiklist í Þjóðleikhúsinu í Ósló í Noregi. Mathias hefur skrifað og frumsýnt tvær óperur: Sú fyrri eftir Bram Stokers Dracula, sú síðari eftir Agöthu Christies And Then There Were None (frumsýnd 27. apríl 2023). Önnur verk eins og The Square og The Transfigurator 3000 hafa verið grunnurinn að nokkrum ungmennaverkefnum, þar sem notkun þeirra á öðrum nótnaskriftarkerfum eins og hreyfingu og trékubba gerir áhorfendum sjálfum kleift að semja í rauntíma.

| Aðrir viðburðir