IL TROVATORE

SÝNINGUM LOKIÐ

Frumsýning 20. október 2012 kl. 20

Óperan Il Trovatore eftir meistara Giuseppe Verdi er ópera sterkra tilfinninga – saga um ástir og hefnd. Tónlistin iðar að sama skapi af rómantík, fögrum laglínum og hrífandi aríum og kórum.

Nokkrir framúrskarandi listamenn á sviði tónlistar og leikhúss sameina krafta sína í þessari haustuppfærslu Íslensku óperunnar árið 2012. Í helstu hlutverkum eru Jóhann Friðgeir Valdimarsson í hlutverki Manrico, Hulda Björk Garðarsdóttir í hlutverki Leonoru, Alina Dubik og Elsa Waage sem skipta með sér hlutverki Azucenu, Viðar Gunnarsson syngur hlutverk Ferrando og hinn virti alþjóðlegi baritónsöngvari Anooshah Golesorkhi er í hlutverki Luna greifa.

Þá heldur bandaríski hljómsveitarstjórinn Carol Crawford um tónsprotann, og er þetta í fyrsta sinn sem kona er hljómsveitarstjóri í óperuuppfærslu hjá Íslensku óperunni. Leikstjóri er Halldór E. Laxness, leikmyndahönnuður er Gretar Reynisson og búninga hannar Þórunn María Jónsdóttir. Kór og hljómsveit Íslensku óperunnar taka ennfremur þátt í verkefninu.

Alls verða sex sýningar á Il Trovatore; laugardaginn 20. október (frumsýning), föstudaginn 26. október, laugardaginn 27. október, sunnudaginn 4. nóvember, laugardaginn 10. nóvember og laugardaginn 17. nóvember. Nánar má lesa um hlutverkaskipan á sýningum með því að smella hér.

Almennt miðaverð á sýningu er 8.000 krónur, en nokkrir verðflokkar eru í boði. 10% afsláttur er fyrir eldri borgara og öryrkja og 50% afsláttur fyrir 25 ára og yngri. Miða með afslætti er ekki hægt að kaupa á netinu.

MIÐASALA Á IL TROVATORE FER FRAM Á
HARPA.IS OG Í SÍMA 528 5050