Um Íslensku óperuna

Íslenska óperan var formlega stofnuð undir lok áttunda áratugarins af hópi ungra söngvara og tónlistarfólks, og átti í tæp þrjátíu ár heimili sitt í Gamla bíói við Ingólfsstræti. Vorið 2011 flutti Óperan í tónlistarhúsið Hörpu og hefur því frá upphafi verið einn af aðalleigjendum hússins.

Í Íslensku óperunni eru árlega færðar á svið spennandi óperusýningar, þar sem íslenskir listamenn eru í forgrunni. Á sínum þrjátíu árum hefur Óperan sett upp yfir áttatíu óperusýningar, allt frá hinum klassísku óperum Mozarts og Verdis til glænýrra verka íslenskra samtímatónskálda. Einnig stendur Íslenska óperan reglulega fyrir tónleikahaldi, bæði með fremstu söngvurum úr íslenskum óperuheimi sem og yngri söngvurum sem eru að stíga sín fyrstu skref, auk ýmissa samvinnuverkefna við einstaka listamenn og tón- og sviðslistahópa. Þúsundir gesta sækja viðburði  Íslensku óperunnar á ári hverju.

Í starfsemi sinni leggur Íslenska óperan áherslu á að nýta sér krafta íslenskra listamanna úr tónlistar- og leikhúsheiminum, en erlendir listamenn hafa jafnframt verið reglulegir þátttakendur í uppfærslum. Flestir af fremstu söngvurum Íslands hafa tekið þátt í sýningum Óperunnar, og hafa margir þeirra íslensku söngvara sem stigu sín fyrstu skref í óperuheiminum á fjölum Íslensku óperunnar síðar orðið þekktir og eftirsóttir söngvarar í hinum alþjóðlega óperuheimi.

Íslenska óperan er sjálfseignarstofnun með styrktarframlag frá íslenska ríkinu. Fastráðnir starfsmenn Íslensku óperunnar árið um kring eru átta talsins, en á sýningartíma óperusýninganna er heildarfjöldi starfsmanna, bæði listamanna og annarra sem að sýningunum starfa, hátt á annað hundrað.