Með því að smella hér má sjá nokkrar stórskemmtilegar myndir úr uppfærslu Íslensku óperunnar á Ástardrykknum - enda er hér um bráðskemmtilega sýningu að ræða! Ljósmyndari er Gísli Egill Hrafnsson.

Tveimur aukasýningum á Ástardrykknum hefur verið bætt við í janúar, föstudaginn 15. janúar og laugardaginn 23. janúar kl. 20. Eru þetta allra síðustu sýningar á þessari vinsælu og skemmtilegu sýningu, sem slegið hefur í gegn jafnt hjá áhorfendum sem gagnrýnendum. Tryggið ykkur miða í tíma – miðaverð er sem fyrr 5.400 kr. í almenn sæti og fá 25 ára og yngri 50% afslátt af miðaverði.  Þá fá félagar í Vinafélagi Íslensku óperunnar, eldri borgarar og öryrkjar 10 % afslátt af miðum.

Enn einn góði dómurinn hefur nú birst í fjölmiðlum um Ástardrykkinn. Um er að ræða umfjöllun á nýjum vefmiðli sem nefnist www.midjan.is og er það Þórhildur Ólafsdóttir blaðamaður sem ritar umsögnina.  Þar segir meðal annars: Stjarna kvöldsins var þó tvímælalaust Dísella. Maður býst einhvernvegin ekki við því að þessi smávaxna kona gefi frá sér kröftuga tóna – en jú, hún gersamlega negldi sönginn. Hún syngur svo fallega og af svo miklum krafti, að mér fannst, þar sem ég sat aftast í salnum, að hún væri við hlið mér. Hvað eftir annað olli flutningur hennar gæsahúð og vellíðunartilfinningu. Bravó!

Dóminn í heild má lesa með því að smella hér.

Fleiri umsagnir um sýninguna má lesa með því að smella hér.