Morgunblaðið greindi frá því í dag að íslenski flautuleikarinn Stefán Ragnar Höskuldsson hefði verið ráðinn í stöðu fyrsta flautuleikara við Metropolitan-óperuna í New York. Þetta er eftirsóttasta flautuleikarastarf í heimi. Að fá fastráðningu er eins og að vinna ólympíugull, sagði Stefán Ragnar í samtali við Morgunblaðið.

Í síðustu viku var haldið prufuspil fyrir starf sólóflautuleikara hljómsveitarinnar og sagði Stefán Ragnar í viðtalinu að um 100 manns hafi þreytt prófið, en umsækjendur eflaust verið miklu fleiri. Stefán Ragnar hefur spilað við Metropolitan í fjögur ár sem annar flautuleikari og leikið sem fyrsti flautuleikari í afleysingum. Sá sem gegndi þeirri stöðu hætti á árinu og þá var efnt til prufuspils.