Kammersveitin Ísafold og Íslenska óperan standa fyrir Vínartónleikum með óvenjulegu sniði sunnudagskvöldið 8. janúar kl. 20. Á efnisskránni eru verk sem voru útsett fyrir kammersveit og flutt af „Félagi um einkaflutning tónverka“ (Verein für Musikalische Privatauffuhrungen), sem tónskáldið Arnold Schönberg stofnaði ásamt fleirum í Vínarborg árið 1918. Kammersveitin Ísafold er skipuð ungu tónlistarfólki, sem flest er í framhaldsnámi erlendis og eru hljóðfæraleikararnir að þessu sinni tólf talsins. Sveitin hefur fengið til liðs við sig Ágúst Ólafsson baritón, sem mun syngja með henni ljóð Gustavs Mahlers. Stjórnandi Ísafoldar er Daníel Bjarnason.

Öskubuska og Rossini eru meginviðfangsefni næsta námskeiðs sem Vinafélag Íslensku óperunnar og Endurmenntun Háskóla Íslands standa fyrir í sameiningu og hefst 7. febrúar nk. Námskeiðið er haldið í tengslum við uppsetningu Íslensku óperunnar á verkinu á vormisseri 2006.