Íslenska óperan hefur verið tilnefnd til Íslensku tónlistarverðlaunanna 2004 sem flytjandi ársins fyrir flutning sinn á  Sweeney Todd í flokknum Sígild og samtímatónlist. Verðlaunin verða afhent við hátíðlega athöfn í Þjóðleikhúsinu miðvikudaginn 2. febrúar 2005. Nánari upplýsingar um Íslensku tónlistarverðlaunin er að finna á vefsíðunni http://www.tonlist.is/

Íslenska óperan og Íslandsbanki hafa undirritað samstarfssamning vegna Óperustúdíós sem Óperan heldur í samstarfi við Listaháskóla Íslands í vor. Íslandsbanki kostar verkefnið í heild sinni. Þetta er í annað sinn sem Íslenska óperan og Listaháskólinn starfa saman að slíku verkefni. Boðið verður upp á námskeið í óperuflutningi í Listaháskólanum fyrir nemendur tónlistardeildar Listaháskólans og annara tónlistarskóla og lýkur því með uppfærslu nemendanna á óperunni Apótekarinn eftir Haydn í Íslensku óperunni. Alls verða sýndar sex sýningar og er frumsýning áætluð 29. apríl 2005. Leikstjóri er Ingólfur Níels Árnason og tónlistarstjóri, Kurt Kopecky.

Morgunblaðið greindi frá því í vikunni að Ólafur Kjartan Sigurðarsson baritón mun syngja aðalhlutverkið í Macbeth hjá Opera Holland Park á óperuhátíð í London næsta sumar. Eins og greint var frá í Óperublaðinu í október hlaut Ólafur Kjartan mikið lof gagnrýnenda í Bretlandi fyrir frammistöðu sína í hlutverki Jack Rance í óperunni La Fanciulla Del West eftir Puccini hjá Opera Holland Park á liðnu sumri.