Alda Ingibergsdóttir sópran lauk einsöngvaraprófi frá Söngskólanum í Reykjavík undir leiðsögn Dóru Reyndal og Ólafs Vignis Albertssonar. Síðar stundaði hún framhaldsnám við Trinity College of Music í London, þar sem aðalkennari hennar var Teresa Cahill. 

Arndís Halla Ásgeirsdóttir lauk 8. stigs prófi frá Söngskólanum í Reykjavík árið 1994 og var aðalkennari hennar þar Snæbjörg Snæbjarnardóttir. Þá lá leiðin til Berlínar, þar sem hún stundaði framhaldsnám hjá Anke Eggers.

Auður Gunnarsdóttir er fædd í Reykjavík.  Hún lauk 8. stigi í söng frá Söngskólanum í Reykjavík vorið 1991 þar sem kennari hennar var Ólöf Kolbrún Harðardóttir.  Árið 1992 hélt hún til Stuttgart þar sem hún stundaði framhaldsnám við tónlistarháskólann og lauk árið 1997 prófi frá óperuskólanum og  ljóða- og einsöngvaradeild.  Kennarar hennar þar voru Prof. Luisa Bosabalian og Carl Davis. 

Dísella Lárusdóttir útskrifaðist úr Söngskólanum í Reykjavík árið 2002 og fór þaðan í meistaranám við Westminster Choir College, Rider University í Princeton í Bandaríkjunum. Þaðan útskrifaðist hún í maí 2005. Stuttu síðar bar hún sigur úr býtum í Astral Artistic Services 2006 National Auditions, komst í undanúrslit í Lauren S. Zachary National Vocal Competition, og í undanúrslit í söngkeppni Plácido Domingo, Operalia 2006.

Guðrún Ingimarsdóttir sópran stundaði nám við Söngskólann í Reykjavík hjá Elínu Ósk Óskarsdóttur og lauk námi þaðan árið 1992. Næstu tvö árin var Guðrún í söngnámi í London. Árið 1995 hóf hún nám í einsöngvaradeild Tónlistarháskólans í Stuttgart hjá prófessor Sylviu Geszty og lauk því árið 1998.

Hallveig Rúnarsdóttir hóf söngnám hjá Sigurði Demetz, en lauk  8.stigi frá  Tónlistarskólanum í Reykjavík hjá  Rut L. Magnússon árið 1998. Hóf síðan nám við Guildhall School of Music and Drama í London og útskrifaðist þaðan með láði sumarið 2001. Meðal hlutverka Hallveigar eru Fiordiligi í Così fan tutte, Jane í Happy End  og Servilia í konsertuppfærslu Sinfóníuhljómsveitar Íslands á La Clemenza di Tito. Hún hefur komið fram sem einsöngvari bæði erlendis og hér heima m.a með Sinfóníuhljómsveit Íslands, Sinfóníuhljómsveit áhugamanna, kammersveitunum Aldavinum og Caput, og auk þess í kirkjulegum verkum.

Hlín Pétursdóttir sópran lauk einsöngvaraprófi frá Tónlistarskólanum í Reykjavík árið 1992 undir leiðsögn Sieglinde Kahmann og stundaði framhaldsnám við óperudeild tónlistarháskólans í Hamborg.

Magnea Tómasdóttir hóf söngnám í Tónlistarskóla Seltjarnarness hjá Unni Jensdóttur og á árunum 1993-96 stundaði hún framhaldsnám hjá Hazel Wood í Trinity-tónlistarháskólanum í Lundúnum. Á árunum 1997-99 var hún í Óperustúdíóinu í Köln. Á námsárunum sótti Magnea fjölmörg námskeið hjá virtum listamönnum, þ.á m. Roger Vignoles, Ian Partridge og Elly Ameling, og kom fram á fjölmörgum tónleikum og árið 2000 komst hún í lokakeppni alþjóðlegrar keppni Wagner-söngvara í Þýskalandi.

Marta Guðrún Halldórsdóttir sópran lauk einsöngvaraprófi frá Tónlistarskólanum í Reykjavík undir handleiðslu Sieglinde Kahmann. Hún fór utan til náms við Hochschule für Musik í München. Þar nam hún söng um fimm ára skeið hjá Adalbert Kraus og  Daphne Evangelatos.

Signý Sæmundsdóttir sópran stundaði tónlistarnám í Kópavogi og Reykjavík og síðan framhaldsnám í söng í Tónlistarháskólanum í Vínarborg, þar sem hún tók lokapróf með bestu einkunn.

Sólrún Bragadóttir stundaði söngnám við Tónlistarskólann í Kópavogi og síðar við Tónlistarskólann í Reykjavík undir handleiðslu Elísabetar Erlingsdóttur, áður en hún hélt til frekara tónlistarnáms við háskólann í Bloomington, Indiana í USA.  Þar lauk hún bæði Bacheleur og Mastergráðu í einsöng og til söngkennara með háum vitnisburði. Meðal kennara hennar þar var hin fræga rúmanska söngkona Virginia Zeani.

Þóra Einarsdóttir stundaði söngnám við Söngskólann í Reykjavík hjá Ólöfu Kolbrúnu Harðardóttur og við Guildhall School of Music and Drama hjá Prof. Lauru Sarti. Þóra þreytti frumraun sína að námi loknu við Glyndebourne Festival Opera árið 1995. Hún steig þó fyrst á svið Íslensku óperunnar aðeins 18 ára gömul í litlum hlutverkum í Rigoletto og í Töfraflautunni.

Þórunn Guðmundsdóttir sópran stundaði nám við Tónlistarskólann í Reykjavík og lauk þaðan námi sem einsöngvari og flautuleikari. Eftir það stundaði hún framhaldsnám í söng við Indiana University í Bandaríkjunum og lauk þaðan doktorsprófi.