|
Dagbók Önnu Frank – einsöngsópera í tveimur þáttum eftir Grigori Frid
Óperan Dagbók Önnu Frank verður sýnd í fyrsta skipti á Íslandi næstkomandi sunnudagkvöld, 25. maí kl. 20, í Íslensku óperunni. Óperan byggir á hinni þekktu dagbók þýsku gyðingastúlkunnar Önnu Frank, sem hún skrifaði meðan hún var í felum undan yfirgangi nasista í síðari heimsstyrjöld ásamt fjölskyldu sinni í Amsterdam. Rússneska tónskáldið Grigori Frid (f. 1915) færði söguna í búning einsöngsóperu árið 1969 og hefur óperan verið færð upp víða um heim á undanförnum árum. Þetta er magnað verk, líkt og Dagbók Önnu sjálfrar, þar sem hin sérstaka sýn ungu stúlkunnar á heiminn og hin grimmdarlegu örlög er undirstrikuð með töfrum tónlistarinnar.
Það er Þóra Einarsdóttir sópransöngkona, sem er fastráðin við óperuna í Wiesbaden, sem fer með hlutverk Önnu Frank hér í Íslensku óperunni, en hún söng hlutverkið í Wiesbaden árið 2005 og hlaut mikið lof fyrir. Með henni koma fram í sýningunni Valerie Sauer dansari og Alexander Scherer píanóleikari, en leikstjórn er í höndum Iris Gerath-Prein. Útlit sýningarinnar hannar Þórunn Sigríður Þorgrímsdóttir og lýsingu hannar Páll Ragnarsson, og er sýningin byggð á uppfærslu Wiesbaden-óperunnar á sömu óperu.
Glitnir styrkir uppsetningu Dagbókar Önnu Frank í Íslensku óperunni, en sýningin er á dagskrá Listahátíðar í Reykjavík.
„Helsti styrkur sýningarinnar er frábær túlkun Þóru Einarsdóttur á Önnu Frank.“ Söngkonan er sannfærandi sem unglingsstúlka en býr þó yfir þeim þroska raddarinnar sem gerir henni kleift að syngja samfellt í rúma klukkustund.“ (Wiesbaden Kurier)
„Hugsanlega væri þessi ópera flutt miklu oftar, ef menn hefðu oftar aðgang að sópransöngkonu á borð við Þóru Einarsdóttur.“…söngkonu, sem hægt er að leggja mikið á og er örugg í öllum blæbrigðum þessarar kröfuhörðu tónlistar…og hefur auk þess vöxt og útgeislun unglingsstúlku.“ (Frankfurter Allgemeine Zeitung)
„Í sviðsetningu Irisar Gerath-Prein hvílir allur þungi sýningarinnar á Þóru Einarsdóttur. Hún heillar fyrst og fremst með skýrum textaflutningi og kraftmikilli en sveigjanlegri sópranrödd sinni, blæbrigðaríkum og samúðarfullum söng.“ (Main- Eco) |
