Það eru 15 ár liðin frá því að Íslenska óperan sýndi Toscu eftir Puccini, og nú er aftur komið að því að Íslendingar fái tækifæri til að sjá þessa vinsælu óperu á sviði Íslensku óperunnar. Frumsýning verður þann 11. febrúar n.k.

Óperan Tosca er í dag ein allra vinsælasta ópera Puccini. Tónlistin er margslungin og grípandi og persónusköpunin kemur ljóslega fram í tónlistinni í gegnum allt verkið. Í tvísöng elskendanna, söngkonunnar Toscu og málarans Cavaradossi speglast ljóðræn fegurð á móti hörku lögregluforingjans Scarpia, sem reynir að ná ástum Toscu með brögðum.

Titilhlutverkið, Toscu syngur Elín Ósk Óskarsdóttir.Hlutverk Cavaradossi syngur Jóhann Friðgeir Valdimarsson, Scarpia, Ólafur Kjartan Sigurðarson, Angelotti, Bergþór Pálsson, Spoletta, Snorri Wium og kirkjuvörðinn Davíð Ólafsson. Kórinn skipa 36 manns. Hljómsveitarstjóri er Kurt Kopecky, leikstjóri er Jamie Hayes og leikmyndina hannar Will Bowen. Búningahönnuður er Þórunn María Jónsdóttir og lýsingu hannar Björn Bergsteinn Guðmundsson.