Glæsibragur var á upphafi starfsársins 2008-2009, en þann 19. september voru frumsýndar óperurnar Cavalleria Rusticana eftir Mascagni og Pagliacci eftir Leoncavallo, þar sem Kristján Jóhannsson steig á svið Íslensku óperunnar í aðalhlutverki í fyrsta sinn. Aðrir söngvarar voru þau Jóhann Friðgeir Valdimarsson, Elín Ósk Óskarsdóttir, Auður Gunnarsdóttir, Tómas Tómasson, Alina Dubik, Sesselja Kristjánsdóttir, Sólrún Bragadóttir, Alex Ashworth og Eyjólfur Eyjólfsson. Hljómsveitarstjóri var Kurt Kopecky og leikstjóri Sveinn Einarsson, en aðrir listrænir stjórnendur voru Þórunn Sigríður Þorgrímsdóttir, leikmyndahönnuður, Helga Björnsson, búningahönnuður og Páll Ragnarsson, ljósahönnuður. Þrír söngvarar úr sýningunni, þau Alina Dubik, Sólrún Bragadóttir og Tómas Tómasson voru tilnefnd til Grímunnar 2009 fyrir hlutverk sín í sýningunni.

Starfsárið 2007-2008 hófst með sýningu á Ariadne á Naxos eftir Richard Strauss og var Arndís Halla Ásgeirsdóttir tilnefnd til Grímunnar fyrir hlutverk Zerbinettu í verkinu. Þá fóru Óperuperlur á svið í nóvermber; þar sem settar voru í leikbúning nokkrar af þekktustu óperuaríum tónbókmenntanna. Aðalverkefni vormisseris var síðan La traviata, vinsælasta óperusýning síðustu ára hérlendis. Sýningin hlaut þrjár tilnefningar til Grímunnar; Filippía Elísdóttir var tilnefd fyrir búninga í sýningunni, Tómas Tómasson fyrir hlutverk Giorgio Germonts og Sigrún Pálmadóttir fyrir hlutverk Víólettu, og hlaut sú síðastnefnda Grímuna fyrir sína mögnuðu frammistöðu. Óperustúdíó Íslensku óperunnar var haldið í fimmta sinn þar sem Cosí fan tutte var tekin fyrir og í maí kom góður gestur í Íslensku óperuna, hinn heimsþekkti barítónsöngvari sir Willard White. Þá var sett upp einsöngsóperan Dagbók Önnu Frank á Listahátíð í Reykjavík í Íslensku óperunni. Hádegistónleikar, opið hús á Þorláksmessu og margt fleira var einnig á döfinni þetta starfsárið.

Starfsárið 2006-2007 hófst með sýningu á óperunni Brottnáminu úr kvennabúrinu eftir Mozart. Bjarni Thor Kristinsson hlaut Grímuna íslensku leiklistarverðlaunin sem söngvari ársins fyrir hlutverk sitt sem Osmin í sýningunni. Skuggaleikur ný íslensk ópera eftir Karólínu Eiríksdóttur og Sjón var frumflutt í Óperunni í nóvember. Aðalverkefni vormisseris var óperan Flagari í framsókn (The Rake‘s Progress) eftir Stravinsky. Hulda Björk Garðarsdóttir sem söng hlutverk Anne Trulove var tilnefnd til Grímunnar íslensku leiklistarverðlaunanna sem söngvari ársin fyrir frábæra frammistöðu. Óperustúdíó Íslensku óperunnar var haldið í fjórða sinn og um páskana frumsýndi Óperukór Hafnarfjarðar í samstarfi við ÍÓ óperuna Cavalleria Rusticana. Hádegistónleikar, söngvaraball og fleira var einnig á döfinni þetta starfsárið. Hér fyrir neðan eru nánari upplýsingar um sýningar og sýningardaga óperuársins 2006-2007.

Óperuárið 2005-2006 var boðið upp á metnaðarfulla dagskrá að vanda. Á haustmisseri var óperan Tökin hert (The Turn of the Screw) eftir Britten á fjölunum. Íslenska óperan hlaut íslensku tónlistarverðlaunin sem flytjandi ársins fyrir flutning sinn á því verki. Á vormisseri var aðalverkefnið Öskubuska eftir Rossini en sú sýning naut mikilla vinsælda og var nánast uppselt á allar sýningar. Óperustúdíó Íslensku óperunnar var starfrækt þriðja árið í röð vorið 2006 og að þessu sinni var það óperan Nótt í Feneyjum eftir Strauss sem var sett á svið. Hádegistónleikar voru haldnir reglulega á þriðjudögum og á vordögum kom breski sönghópurinn I Fagiolini í heimsókn í samstarfi við Listahátíð. Einnig voru söngleikirnir Kabarett og Litla hryllingsbúðin á fjölunum í Gamla Bíói þetta starfsárið. Hér að neðan eru nánari upplýsingar um sýningar og sýningardaga óperuársins 2005-2006.

Óperuárið 2004-2005 var boðið upp á fjölbreytta dagskrá að vanda. Á haustmisseri 2004 var Óperan Sweeney Todd eftir Stephen Sondheim sett á svið. Einnig var boðið upp á hádegistónleika, kynningu á Sweeney Todd í Laugarborg og í samstarfi við Flóð og fjöru var söngleikurinn Litla stúlkan með eldspýturnar á fjölunum. Á vormisseri 2005 var óperan Tosca sýnd og var nánast uppselt á allar sýningar. Hádegistónleikaröðin hélt áfram göngu sinni, söngvarar úr Toscu héldu tónleika í Laugarborg og Óperustúdíóið sýndi Apótekarann eftir Haydn. Hér að neðan eru nánari upplýsingar um sýningar og sýningardaga óperuársins 2004-2005.

Óperuárið 2003-2004 var m.a. Werther, unglingaóperan Dokaðu við, óperutvennan Madama Butterfly & Ítalska stúlkan í Alsír, hádegistónleikar, Haustkvöld í Óperunni, Brúðkaup Fígarós  og Carmen á dagskrá Íslensku óperunnar.  Hér að neðan er yfirlit yfir sýningar og sýningardaga og nánari upplýsingar um sýningarnar starfsárið 2003-2004

Á dagskránni óperuárið 2002-2003 var m.a. Macbeth, óperutvennan Madama Butterfly & Ítalska stúlkan í Alsír, hádegistónleikar, Mozart-tónleikar, Rópera, Rakarinn í Sevilla, og Íslendingurinn fljúgandi. Nánar um það hér að neðan: