Hinir mánaðarlegu hádegistónleikar Íslensku óperunnar í Hörpu nk. þriðjudag 18.des. kl.12:15 verða að þessu sinni helgaðir tónskáldinu og mezzósópransöngkonunni Pauline Viardot, sem þykir ein merkilegasta söng-og tónlistarkona 19.aldarinnar. Sesselja Kristjánsdóttir mezzósópran og Antonía Hevesi píanóleikari flytja annars vegar nokkur sönglög eftir Pauline og hinsvegar frægar óperuaríur, sem sérstaklega voru samdar fyrir hana.

Hádegistónleikarnir verða í Norðurljósasal Hörpu og er aðgangur ókeypis.

Pauline Viardot ( 1821-1910 ) lærði píanóleik hjá Franz Liszt og hafði mikil áhrif á tónlistar-og listalíf Evrópu á 19.öld. Hún samdi yfir hundrað ljóð, eina óperu, fjórar óperettur, fjölmörg píanóverk auk fiðlutónlistar. Meðal náinna vina hennar voru tónskáldin Chopin, Clara Schumann, Brahms,Gounod og Berlioz. Sömuleiðis rithöfundarnir Alfred de Musset, George Sand og ekki síst rússneski rithöfundurinn Ivan Turgenev. Hún giftist að vísu óperustjóranum Louis Viardot og átti með honum þrjú börn en var engu að síður ástkona Turgenevs, sem var heimilisvinur þeirra hjóna í yfir 40 ár.

Mörg verk voru sérstaklega samin fyrir Pauline Viardot eins og Alt Rapsodia Brahms eða tileinkuð henni eins og óperan Samson og Dalila eftir Saint-Saëns. Schumann, Gounod og Fauré sömdu allir verk fyrir hana.

Hinn glæsilegi veitingastaður Kolabrautin á fjórðu hæð Hörpu, býður tónleikagestum að panta mat fyrir tónleikana sem verður svo tilbúinn á veitingastaðnum strax að þeim loknum. Réttur dagsins er pönnusteiktur lax með smælki kartöflum, næpu, rauðlauk og skelfisksósu. Verð á hádegisverðinum er 2.490 kr. og verða þjónar frá Kolabrautinni við innganginn á tónleikum og taka við pöntunum.