Kurt Kopecky (hljómsveitarstjóri) er fæddur í Austurríki og hóf píanónám þar sjö ára gamall. Á árunum 1994-2000 stundaði hann nám í hljómsveitarstjórn við Tónlistarháskólann í Vínarborg og lauk þaðan meistaragráðu. Einnig lagði hann stund á píanómeðleik við sama skóla. Hann sótti auk þess fjölda meistaranámskeiða í kórstjórn. Á árunum 2000-2003 starfaði hann sem hljómsveitarstjóri, söngþjálfari og æfingastjóri í Biel-Solothurn leikhúsinu í Sviss og kom þaðan til starfa sem tónlistarstjóri Íslensku óperunnar haustið 2003. Kurt Kopecky hefur stjórnað ýmsum óperuuppfærslum í Austurríki, Þýskalandi, Sviss og Finnlandi og einnig komið víða fram sem meðleikari á píanó. Hann hefur komið fram sem gestastjórnandi með ýmsum sinfóníuhljómsveitum, t.d. Tonkünstler Orchester í Austurríki, Orquestra Nacional do Porto og sinfóníuhljómsveitunum í Oulu og Kuopio. Í september sl. var hann gestastjórnandi Sinfóníuhljómsveitar Íslands á tvennum tónleikum í Háskólabíói. Kurt stjórnaði uppfærslu á Werther í Íslensku óperunni haustið 2003 og Carmen sem Íslenska óperan setti upp vorið 2004 á Eskifirði í samvinnu við Óperustúdíó Austurlands. Hann var aðstoðarhljómsveitarstjóri í Brúðkaupi Fígarós og hljómsveitarstjóri í Sweeney Todd og Toscu í Íslensku óperunni. Sl. haust stjórnaði hann Tökin hert í Íslensku óperunni.

Paul Suter (leikstjóri)   er Svisslendingur. Hann starfaði sem aðstoðarleikstjóri við Ríkisleikhúsið í Bern, Grand Théâtre de Genéve (m.a með Maurice Béjart), við óperuhúsið í Zürich (m.a. með August Everding og Nikolaus Lehnhoff), við óperuna í París og Ríkisóperuna í München. Hann setti upp barnaóperuna Pollicino eftir Hans Werner Henze við nemendaleikhús óperuhússins í Zürich. Í leikhúsinu í Biel-Solothurn leikstýrði hann Ítölsku stúlkunni í Alsír, La traviata, Der Zarewitsch Fra Diavolo og Brottnáminu úr kvennabúrinu, sem hann setti einnig upp í óperunni í Bilbao. Önnur verkefni hans í Bilbao eru Fidelio, Nabucco og Töfraflautan. Við óperuna í Metz leikstýrði hann Hollendingnum fljúgandi og í óperunni í Dublin Rakaranum í Sevilla. Í óperuhúsinu í Zürich leikstýrði hann frumflutningi á kammeróperu Peter Aderhold Odysseus und der Fremde, sem síðan var einnig sett upp í Cuvillé-Theater í München á óperulistahátíðinni 2001. Á listahátíðinni Ticino Musica Locarno setti hann upp óperuna Il matrimonio segreto eftir Cimarosa. Hjá Zürcher Kammerorchester setti hann upp The Pirate of Penzance eftir Gilbert og Sullivan og í Bremgarten La Périchole eftir Offenbach. 

Anna Margrét Óskarsdóttir (Tisbe) stundaði söngnám við Nýja tónlistarskólann hjá Alinu Dubik og útskrifaðist þaðan sl. vor. Hún lauk 8. stigs prófi vorið 2002 og burtfararprófi vorið 2004 og hélt einsöngstónleika að loknum báðum þessum prófum. Hún lauk síðan einsöngvaraprófi í nóvember 2004. Anna Margrét stundaði einnig píanónám um langt skeið, m.a. við Nýja tónlistarskólann. Hún hefur komið fram sem einsöngvari við ýmis tækifæri, s.s. í óratóríum, við kirkjulegar athafnir og á tónleikum.

Bergþór Pálsson (Dandini) stundaði nám við Tónlistarskólann í Reykjavík og Indiana University í Bloomington þar sem hann lauk B.M.- og meistaranámi. Árið 1996 lauk hann leiklistarnámi frá Drama Studio London. Af ótal óperuhlutverkum hans má nefna titilhlutverkið í Évgení Ónegín, titilhlutverkið í Don Giovanni, Almavíva greifa í Brúðkaupi Fígarós og Papagenó í Töfraflautunni, Malatesta í Don Pasquale og Enrico í Lucìa di Lammermoor, Germont í La Traviata, Sharpless í Madama Butterfly og Marcello í La Bohème. Þá hefur hann haldið fjölda ljóðatónleika, sungið einsöng með Sinfóníuhljómsveit Íslands og Kammersveit Reykjavíkur, einnig einsöngshlutverk í kórverkum, svo sem í Mattheusarpassíu, Jóhannesarpassíu og Jólaóratóríu Bachs, Sköpuninni og Árstíðunum eftir Haydn, Sálumessu Mozarts, Messíasi Händels og Elía Mendelssohns. Bergþór hefur tekið þátt í frumflutningi á verkum eftir íslensk tónskáld. Af þeim má nefna óperurnar Galdra-Loft eftir Jón Ásgeirsson, Stúlkuna í vitanum eftir Þorkel Sigurbjörnsson og Kalla og sælgætisgerðina eftir Hjálmar H. Ragnarsson og hljómsveitarverkið Tímann og vatnið eftir Atla Heimi Sveinsson.

Davíð Ólafsson (Don Magnifico) stundaði nám við Söngskólann í Reykjavík. Þá hélt hann til framhaldsnáms við óperudeild Tónlistarháskólans í Vínarborg. Að námi loknu var Davíð fastráðinn við Óperuna í Lübeck í tvö ár, auk þess sem hann hefur verið gestasöngvari við óperuhús í Sviss, Austurríki, Þýskalandi og San Francisco í Bandaríkjunum. Hann hefur haldið fjölda tónleika á Íslandi og á meginlandi Evrópu. Meðal hlutverka sem Davíð hefur sungið eru Leporello í Don Giovanni, Doktor Bartolo í Brúðkaupi Fígarós, John Falstaff í Kátu konunum frá Windsor og Sarastró í Töfraflautunni. Í Lübeck söng hann hlutverk Don Alfonso í Cosi fan tutte vorið 2001 og sumarið 2002 söng hann hlutverk Don Basilio í Rakaranum í Sevilla á óperuhátíðinni í Merzig í Þýskalandi. Davíð var fastráðinn við Íslensku óperuna 2002-2004 og var fyrsta hlutverk hans þar Doktor Bartolo í Rakaranum í Sevilla. Vorið 2003 söng hann hlutverk Mustafa soldáns í Ítölsku stúlkunni í Alsír og hlutverk amtmannsins í Werther haustið 2003. Önnur hlutverk hjá Íslensku óperunni eru Doktor Bartolo í Brúðkaupi Fígarós, Turpin dómari í Sweeney Todd og kirkjuvörður í Toscu.

Einar Th. Guðmundsson (Alidoro) hóf söngnám hjá Eyrúnu Jónasdóttur við Tónlistarskóla Rangæinga árið 1999. Einar lauk 8. stigs prófi tveimur árum síðar og útskrifaðist frá Tónlistarskóla Rangæinga og Söngskólanum í Reykjavík vorið 2001. Um haustið sama ár bauðst honum skólavist við Mozarteum tónlistarháskólann í Salzburg í Austurríki við bæði ljóða- og óperudeild skólans. Kennarar hans þar voru m.a. Martha Sharp, Wolfgang Holzmair og Margaret Singer. Vorið 2003 var Einari boðin fastráðning við Volksoper, þjóðaróperuna í Vínarborg, þar sem hann starfar enn í dag. Meðal þeirra hlutverka sem Einar hefur sungið má nefna Dr. Falke í Leðurblökunni, Tristan í Mörthu eftir Flotow, Schaunard í La Bohème, Alidoro í Öskubusku, Sprecher í Töfraflautunni, Nardo í La Finta Giardiniera og Kruschina í Seldu brúðinni auk fjölda annarra hlutverka. Þá söng Einar í frumflutningi á óperu Niculaus Schappfl Der kleine Prinz í Salzburg sumarið 2003 og aftur í München 2004. Á komandi hausti mun Einar syngja hlutverk Leporello í Don Giovanni í Volksoper á sérstakri Mozarthátíð sem haldin verður á næstu leiktíð í Vínarborg og víðar í tilefni af því að 250 ár eru frá fæðingu tónskáldsins.

Garðar Thór Cortes (Don Ramiro) hóf söngnám í Söngskólanum í Reykjavík árið 1993 hjá Ólöfu Kolbrúnu Harðardóttur og lauk þaðan prófi fjórum árum síðar. Eftir það stundaði hann nám við Hochschule für darstellende Kunst und Musik í Vínarborg, sótti einkatíma hjá André Orlowitz í Kaupmannahöfn og stundaði nám við óperudeild Konunglega tónlistaháskólans í Lundúnum. Garðar Thór hefur komið víða fram og haldið einsöngstónleika, sungið í söngleikjum, óratóríum og óperum hér heima, víðsvegar í Evrópu og einnig í Bandaríkjunum. Á síðastliðnu ári söng Garðar Thór hlutverk Ferrando í Cosi fan tutte með English Touring Opera og á Rossini hátíðinni í Wildbad í Þýskalandi söng hann hlutverk greifans Alberto í óperunni L’occasione fa il ladro. Haustið 2005 söng Garðar Thór hlutverk hertogans í Rigoletto við Opera Nordfjord í Noregi.

Hlín Pétursdóttir (Clorinda) lauk einsöngvaraprófi frá Tónlistarskólanum í Reykjavík árið 1992 undir leiðsögn Sieglinde Kahmann og stundaði framhaldsnám við óperudeild tónlistarháskólans í Hamborg. Hún var gestasöngvari í Stuttgart og Bern og að loknu námi fastráðin í Kaiserslautern. Meðal hlutverka hennar þar voru Adele í Leðurblökunni , Despina í Così fan tutte, Frasquita í Carmen og Sophie í Rosenkavalier og auk þess m.a.hlutverk Xeniu í Boris Godunov í Frankfurt. Sumarið 1997 söng hún hlutverk Gabriele í La vie Parisienne á óperettuhátíðinni í Mörbisch í Austurríki. Hlín var fastráðin við Theater am Gärtnerplatz í München frá 1997-2004. Meðal hlutverka hennar þar voru Olympia í Ævintýrum Hoffmanns, Blonde í Brottnáminu úr kvennabúrinu, fyrsta dama í Töfraflautunni og Clorinda í Öskubusku. Á þessum árum söng hún sem gestur í óperuhúsum víðsvegar í Þýskalandi. Fyrsta hlutverk Hlínar í Íslensku óperunni var Musetta í La Bohème 2001. Hún hefur haldið fjölda ljóðatónleika og hefur einnig sérstakan áhuga á nútímatónlist. Meðal stærri tónleika eru Carmina Burana og Requiem Mozarts í tónlistarhöllinni í Hamborg, Messías í Hamborg og Strahlsund, c-moll messa Mozarts í Hamborg og Kaiserslautern, óperettugala í Fílharmóníunni í Berlín og í Óperunni í Frankfurt. Hlín flutti heim haustið 2004 og hefur síðan þá sungið á ljóða- og kammertónleikum, m.a. á Sumartónleikum í Skálholti, auk þess að koma fram í sjónvarpi og útvarpi.

Sesselja Kristjánsdóttir (Öskubuska) stundaði nám við Tónlistarskólann í Reykjavík. Þaðan hélt hún í framhaldsnám til Berlínar í Hochschule für Musik „Hanns Eisler“ og lauk þar diplomprófi með hæstu einkunn haustið 2000. Sumarið 2001 lauk Sesselja svo eins árs framhaldsnámi frá sama skóla. Sesselja hlaut Bayreuth-styrk þýsku Richard Wagner samtakanna sumarið 2000. Hún hefur komið fram á tónleikum hér heima og erlendis, m.a. með Sinfóníuhljómsveit Íslands. Meðal óperuhlutverka er Nacbarin í Mavra, Lis í Wie werde ich reich und glücklich, Berta í Rakaranum í Sevilla við Nationale Reisoper í Hollandi. Sesselja var fastráðin við Íslensku óperuna 2002-2004. Hjá Íslensku óperunni hefur Sesselja sungið hlutverk þriðju meyjar í Töfraflautunni, Rosinu í Rakaranum í Sevilla, Suzuki í Madama Butterfly, Isabellu í Ítölsku stúlkunni í Alsír, Charlottu í Werther og Cherubino í Brúðkaupi Fígarós. Hún söng titilhlutverkið í Carmen eftir Bizet í uppfærslu Íslensku óperunnar og Óperustúdíós Austurlands á Eskifirði. Haustið 2004 söng hún hlutverk betlikerlingar í Sweeney Todd hjá Íslensku óperunni.

Season Chiu (leikmynda-og búningahönnuður) er fædd í Hong Kong. Að loknu listanámi á Ítalíu og í Frakklandi vann hún sem aðstoðarleikmynda- og búningahönnuður á listahátíðunum í Avignon og Aix-en Provence í Frakklandi. Meðal annarra verka hennar er leikmynd og búningar fyrir uppfærslu á Pollicino, barnaóperu Hans Werner Henzes, við nemendaleikhús óperuhússins í Zürich, í leikhúsinu Biel-Solothurn Ítalska stúlkan í Alsír, La Traviata, Zarewitsch, Brottnámið úr kvennabúrinu og Fra Diavolo. Við Theater 11 í Zürich vann hún leikmynd og búninga fyrir barnaóperu svissneska tónskáldsins Andreas Nick og á listahátíðinni Ticino Musica Locarno fyrir óperuna Il matrimonio segreto eftir Cimarosa. Season er auk þessa listmálari og vídeólistamaður. Hún hefur haldið sýningar m.a. í Zürich, París, Brussel, Clermont-Ferrand, Metz, Istanbúl, Madrid, Meiningen og Vichy. 

Jóhann Bjarni Pálmason (ljósahönnuður) hóf störf hjá Íslensku óperunni árið 1984 og er nú fastráðinn ljósameistari Óperunnar. Árin 1991-1993 stundaði hann nám í ljósahönnun í The Central School of Speech and Drama í Lundúnum. Jóhann hefur hannað lýsingu fyrir Íslenska dansflokkinn, Hitt leikhúsið, Þjóðleikhúsið, Leikfélag Akureyrar, Frú Emelíu, leikhópinn Augnablik, The Icelandic Takeaway Theater, leikhópinn Á senunni og Sinfóníuhljómsveit Íslands auk Íslensku óperunnar.  

Zbigniew Dubik (konsertmeistari) nam fiðluleik við Tónlistarháskólann í Gdansk árin 1978-1983. Árið 1982 hóf hann að leika með Pólsku Fílharmóníuhljómsveitinni og ferðaðist með henni sem konsertmeistari um Sovétríkin, Þýskaland, England, Danmörku, Frakkland, Spán, Ítalíu og Bandaríkin. Gerðar voru upptökur fyrir pólsk, frönsk og þýsk fyrirtæki, mestmegnis kammertónlist. Árið 1988 var Zbigniew ráðinn í fasta stöðu í Sinfóníuhljómsveit Íslands. Hann gegndi jafnframt stöðu konsertmeistara í Hljómsveit Íslensku óperunnar frá árinu 1990-1994. Síðan Zbigniew fluttist til Íslands hefur hann leikið kammertónlist með ýmsum hópum tónlistarmanna, svo sem Strengjakvartett Reykjavíkur, Bernardel strengjakvartettinum, Caput-hópnum, Kammersveit Reykjavíkur og Kammersveit Hafnarfjarðar. Auk þessa kennir Zbigniew við Nýja Tónlistarskólann í Reykjavík. Haustið 2002 var Zbigniew konsertmeistari Hljómsveitar Íslensku óperunnar í sýningum á Rakaranum í Sevilla og haustið 2004 í Sweeney Todd.

Peter Ross (aðstoðarmaður leikstjóra) er fæddur í Gleiwitz í Silesia. Hann nam tónlistarfræði, sálfræði og heimspeki við háskólana í Hamborg og Bern og lauk meistaragráðu 1975. Hann lauk doktorsprófi árið 1980 og fjallaði doktorsritgerðin um samband milli texta og tónlistar í óperum Verdis. Á árunum 1975-1988 var hann aðstoðarmaður og fyrirlesari við háskólann í Bern. Frá árinu 1983 hefur hann starfað sem tónlistarleikhúsfræðingur við borgarleikhúsin í Bern, Dortmund og Stuttgart og enn fremur sem gestaleikhúsfræðingur við óperurnar í Frankfurt, Dublin og Metz. Hann hefur sérstaklega lagt stund á rannsóknir á óperum eftir Verdi, Boito og Puccini og er meðlimur í Centro Studi Giacomo Puccini í Lucca á Ítalíu.

Sólveig Elín Þórhallsdóttir (sýningarstjóri) lærði sýningarstjórn í The Central School of Speech and Drama í London og útskrifaðist þaðan árið 1997. Hún var sýningarstjóri hjá Leikfélagi Akureyrar 1997 – 1999, verkefni þar voru m.a. Söngvaseiður, Á ferð með frú Daisy og Pétur Gautur. Sólveig var fastráðin sem sýningarstjóri á Stóra sviði Borgarleikhússins hjá Leikfélagi Reykjavíkur frá árinu 1999 til haustsins 2004. Verkefni hennar hjá LR voru m.a. Litla Hryllingsbúðin, Kysstu mig Kata, Skáldanótt, Sól og Máni, Lína Langsokkur og Chicago. Einnig starfaði Sólveig með Íslenska dansflokknum á þeim tíma sem hún var við störf í Borgarleikhúsinu. Sólveig var sýningarstjóri í Sweeney Todd hjá Íslensku óperunni haustið 2004 og Tökin hert haustið 2005. Ennfremur í Kabarett, sem leikhópurinn Á senunni setti upp í samstarfi við Íslensku óperuna haustið 2005.

Antonía Hevesi (æfingastjóri og píanóleikari á æfingum) er fædd í Ungverjalandi. Hún útskrifaðist árið 1988 úr F. Liszt Tónlistarakademíunni í Búdapest með meistaragráðu í kórstjórn og sem framhaldsskólakennari í söng og hljómfræði. Frá árinu 1990 stundaði hún orgelnám í Austurríki við Tónlistarháskólann í Graz hjá prófessor Otto Bruckner. Antonía fluttist til Íslands árið 1992. Árið 1998 gaf hún út 24 orgellög, eigin útsetningar fyrir orgel. Antonía hefur haldið fjölda tónleika sem orgelleikari og píanó-meðleikari í Ungverjalandi, Austurríki, Svíþjóð, Finnlandi, Frakklandi, Þýskalandi, Spáni, Íslandi og Bretlandi. Hún hefur leikið á tónleikum víða um land og spilað inn á geisladiska. Jafnframt hefur hún tekið þátt í masterklass-námskeiðum, m.a í „Académie Internationale d´Eté de Nice“ í Frakklandi í píanóundirleik hjá Dalton Baldwin og í söng hjá Lorraine Nubar. Einnig hjá Oliveru Miljakovic á Íslandi. Frá því í ágúst 2002 hefur Antonía verið listrænn stjórnandi og píanóleikari hádegistónleikaraðar Hafnarborgar. Antonía starfar nú sem orgel- og píanómeðleikari á Íslandi, organisti í Hafnarfjarðarkirkju og æfingapíanisti við Íslensku óperuna.