Viðar Gunnarsson bassi er fæddur í Óðinsvéum í Danmörku. Viðar stundaði nám við Söngskólann í Reykjavík þar sem Garðar Cortes var aðalkennari hans. Síðan var hann við framhaldsnám hjá dr. Folke Sällström í Stokkhólmi 1981 til 1984. Viðar hefur ennfremur sótt ýmis námskeið m.a í ljóðasöng (Master Class) hjá dr. Eric Werba 1981 og óperunámskeið (Master Class) hjá prófessor Helene Carusso og Kostas Paskalis 1984 og 1987.

Meðan á söngnámi stóð söng hann um árabil með kór Langholtskirkju, kór Lögreglunar í Reykjavík, kór Söngskólans í Reykjavík og kór Íslensku Óperunnar. Viðar lét félagsmál söngvara til sín taka meðan hann var enn búsettur á Íslandi og var formaður deildar íslenskra óperusöngvara í Félagi íslenskra leikara frá 1988 til 1989. 

Að loknu stúdentsprófi stundaði hann ýmis störf m.a. kennslu við Árbæjarskóla, sem lögreglumaður í Reykjavík og var deildarstjóri hjá Ríkisútgáfu námsbóka og Námsgagnastofnun. Að námi loknu í Svíþjóð starfaði hann hjá bókaforlaginu Vöku-Helgafelli 1984 til 1989 ásamt því að syngja reglulega við Íslensku Óperuna frá 1984 og Þjóðleikhúsið frá 1985 en hann söng m.a. hlutverk æðstaprestsins Ramfis í Aidu, Ferrando í Il Trovatore, Masetto og höfuðsmannsins (Don Giovanni).

Hann var ráðinn sem óperusöngvari við Kammeróperuna og Schönbrunn Schloßtheater í Vínarborg 1989 til 1990 þar sem hann söng hlutverk Sarastrós í Töfraflautunni. Hann var fastráðinn óperusöngvari við Ríkisleikhúsið í Wiesbaden frá 1990 - 1995 en þar söng hann m.a. Rocco í Fidelio, Il Grand‘Inquisitore í Don Carlos, Padre Guardiano í Á valdi örlaganna, hlutverk tónlistarkennarans Don Basilio í Rakaranum frá Sevilla, hlutverk Regins í Rínargullinu, Hundings í Valkyrjunum og Marke konung í Tristan og Isolde.

Auk þess hefur hann komið fram víða m.a. í óperuhúsunum í Bonn, Essen, Mannheim, Frankfurt, Stuttgart, Wiesbaden og Kassel í Þýskalandi. Einnig hefur hann komið fram í Genf og Bern í Sviss, Vín í Austurríki, Prag í Tékklandi, í Tel Aviv í Ísrael og í Reykjavík og unnið með stjórnendum eins og Maurizio BARBACINI, Bertrand de BILLY, Oleg CAETANI, prófessor . Wolf - Dieter HAUSCHILD, Eliahu INBAL, Jiri KOUT, Armin JORDAN, Jonathan NOTT, Rico SACCANI, Petri SAKKARI, Ulf SCHIRMER, prófessor Rheinhard SCHWARZ, Marc SOUSTROT, Robin STAPLETON, Simone YOUNG og Alfred WALTER.

Viðar hefur sungið á sínum ferli um það bil 70 hluverk eins og t.d. Colline í La Bohème, Pater Guardiano í Á valdi örlaganna, Fiesco í Simone Boccanegra, Zaccaria í Nabucco, Grand‘Inquisitor í Don Carlos, konunginn og Ramfis í Aida, Sarastro í Töfraflautunni, Commedatore og Leporello í Don Giovanni, Boris í Boris Godunow, Don Basilio í Rakaranum frá Sevilja, risanna Fasolt og Fáfni í Rínargullinu, Hunding í Valkyrjunum, illvirkjann Högna í Götterdemmerung, Heinrich konung í Lohengrin, Hermann landgreifa í Tannhäuser, Daland í fljúgandi Hollendingnum, Marke konung í Tristan og Isolde og Titurel í Parsifal.

Í september 2004 debúteraði Viðar í Ríkisóperunni í Berlín en þar söng hann hlutverk konungsins í Aidu undir stjórn Simone Young.

Heimasíða Viðars Gunnarssonar

Senda Viðari tölvupóst