Bjarni Thor Kristinsson hóf söngnám við tónlistarskólann í Njarðvík hjá Ragnheiði Guðmundsdóttur og stundaði það síðan með hléum áfram í Tónskóla Sigursveins og Söngskólanum í Reykjavík. Haustið 1994 hélt Bjarni til frekara náms við óperudeild Tónlistarháskólans í Vín og naut þar leiðsagnar Helene Karusso og Curt Malm.

Vorið 1996 var Bjarni síðan ráðinn sem aðalbassasöngvari Þjóðaróperunnar þar í borg. Þar var hann fastráðinn til þriggja ára og að þeim tíma liðnum sneri hann sér einungis að lausamennsku. Meðal helstu óperuhlutverka Bjarna má nefna: Barón Ochs í Rósariddaranum, Osmin í Brottnáminu úr kvennabúrinu, Pímen í Boris Godunow , Rocco í Fidelio, John Falstaff í Kátu konunum frá Windsor, van Bett í Zar und Zimmermann, að ógleymdum ýmsum hlutverkum í óperum Wagners: Wotan í Rínargullinu, Pogner í Meistarasöngvurunum, Daland í Hollendingnum fljúgandi, Gurnemanz í Parsifal og risanum Fáfni í Niflungahringnum. Eftir að Bjarni gerðist lausamaður í söng hefur hann verið fastur gestur í Ríkisóperunni í Berlín auk þess að koma fram í óperuhúsum í Chicago, París, Verona, Flórenz, Palermo, Róm, Hamborg, Dresden, München, Wiesbaden og Dortmund svo eitthvað sé nefnt. Hann hefur m.a. sungið undir stjórn Zubin Mehta, Daniel Barenboim, Kent Nagano, Betrand de Billy og sir Andrew Davis. Nýleg hlutverk Bjarna eru m.a. Kaspar í Freishütz í Japan, Daland í Hollendingnum fljúgandi í Melbourne, Sarastro í Töfraflautunni í Monte Carlo og Hinrik konungur í Lohengrin í Palermo.  Bjarni söng hlutverk Osmin í Brottnáminu úr kvennabúrinu hjá Íslensku óperunni haustið 2006 og fékk Grímuna, íslensku leiklistarverðlaunin, sem söngvari ársins fyrir hlutverkið. Bjarni Thor söng í Óperuperlum sem Íslenska óperan setti upp árin 2007 og 2009.