Eins og flestir vita eru starfandi á erlendum vettvangi fjöldamargir íslenskir óperusöngvarar, sem margur hverjir syngja um þessar mundir í aðalhlutverkum við virt óperuhús bæði í Evrópu og vestanhafs. Sem dæmi má nefna að Bjarni Thor Kristinsson, sem söng eitt aðalhlutverkanna í Ástardrykknum í Íslensku óperunni nú í vetur, hefur í vor sungið hlutverk Barons Ochs í Rósariddaranum eftir Strauss við Kölnaróperuna, en ein þriggja óperusöngkvenna sem deila með sér hlutverki Marskálksfrúarinnar er engin önnur en hin virta söngkona og Íslandsvinur, Kiri Te Kanawa. Í maímánuði bregður Bjarni Thor sér svo aftur í hlutverk Ochs í Barcelona, er hann syngur hlutverkið við Liceu-óperuna þar í borg.

Kristinn Sigmundsson hefur einnig sungið hlutverk Barons Ochs í vetur, þar á meðal í Metropolitan-óperunni eins og íslenskum óperugestum er kunnugt, en sýnt var beint frá sýningu á verkinu í Kringlubíói og víðar um heim í janúar. Kristinn hefur einnig sungið hlutverkið í vor í Deutsche Oper í Berlín, en framundan hjá honum er hlutverk Sarastro í Töfraflautu Mozarts í óperunni í Toulouse.

Sigrún Pálmadóttir, hin eftirminnilega Traviata við Íslensku óperuna vorið 2008, er enn starfandi í Bonn og hefur í vetur sungið bæði hlutverk Gildu í Rigoletto sem og Adinu í Ástardrykknum við óperuhúsið þar í borg.

Ólafur Kjartan Sigurðarson syngur um þessar mundir hlutverk Groves í óperunni Doctor Atomic eftir John Adams við óperuhúsið í Saarbrucken, en framundan hjá honum við húsið í vor og sumar eru hlutverk Giorgio Germont í La traviata og Iago í Otello Verdis.

Hrólfur Sæmundsson syngur um þessar mundir titilhlutverkið í Evgení Onegin í óperunni í Aachen. Að auki syngur hann þar Papageno og Ford í Falstaff eftir Verdi, og æfir um þessar mundir Sharpless í Madama Butterfly.

Þá syngur Tómas Tómasson Count Tomsky í Spaðadrottningunni eftir Tchaikovsky í Houston-óperunni og Þóra Einarsdóttir syngur eina af Filles-Fleurs í Parsifal Wagners í Genfaróperunni.

Íslenska óperan vill gjarnan fylgjast með íslenskum söngvurum á erlendri grundu. Ábendingar má gjarnan senda á kynningarstjóra ÍÓ, Ingu Maríu Leifsdóttur, á ingamaria@opera.is.